سارة احنا لازم نتكلم

- سارة إحنا لازم نتكلم

= مالك يا أحمد

- مش هينفع نتكلم شات .. إحنا لازم نتكلّم فون

= خير طيب

- مينفعش شات .. لازم نتكلّم فون

= ما أنا نسيت أقولك إني خرسا

- يعني إيه

= يعني مبسمعش .. قول بس وأنا هفهم .. في إيه بقى

- سارة إحنا مش هينفع نكمّل مع بعض

= ليه بس يا أحمد .. ده أنا ما صدقت لقيتك .. وإذا كان موضوع الصوت ده مضايقك أنا هتعالج

- يا سارة افهميني إنتي تستاهلي واحد أحسن مني

= بس أنا مش عايزه غيرك .. أنا عايزه أحمد الطيب الحنيّن الجدع

- أنا أحمد الشرير الجاحد الندل .. أنا كنت ببلغ عن صحابي إللي بياكلوا في الحصة

= بس دي مش ندالة .. إنت بتعمل لمصلحتهم .. عشان يركّزوا في الحصة

- ما أنا كنت بغلوش على تركيزهم

= هما إللي مش مركزّين من الأساس

- بردو .. طب يا سارة أنا بكّرع وأنا باكل وبرمي البواقي في الأرض

= أنا أشيل وراك يا أحمد

- وبعمل أصوات وأنا نايم

= وفيها إيه .. ما كلنا بنعمل أصوات وإحنا نايمين .. ولو عايز اعملها وإنت صاحي عادي

- يا سارة إفهميني بقى

= إفهمني إنت .. نفسي أعرف أنا زعلتك في إيه؟ إيه إللي خلّاك تغيّر رأيك في علاقتنا

- لبسك يا هانم يعني إيه نبقى خارجين وواحد يقولي حلوة المزّة إللي في إيدك ها

= إمتى ده إحنا لسّه متكلمين من أسبوع ولسّة متقبلناش .. حصل إمتى ده

- ها .. متغيريش الموضوع .. قوليلي منظري يبقى إيه ساعتها

= يابني إحنا لسّة مخرجناش أصلًا

- لا خرجنا في دماغي .. أنا قررت إننا خرجنا يبقى خرجنا .. هتراجعي ورايا .. بتكدبيني يعني

= لا يا حبيبي هو أنا أقدر .. أنا آسفه

- آسفه؟ طب سارة أنا عندي مشاكل كتير جدًا

= نحلها سوا .. أومال أنا روحت فين؟

- لا مشاكلي دي ملهاش حل

= مفيش حاجة اسمها ملهاش حل

- سارة أنا بفتح النيش وأشرب في الفناجين والكوبيات وباكل بالشوك الجديدة وبرميها في الژبالة

= فداك يا أحمد .. هو مش الحاجات دي عملوها عشان نستخدمها يبقى لازم تاكل فيها وتشرب فيها .. ولو عايز تاخد فيها

- اييييه .. إنتي بتقولي إيه

= لو عايز تاخد فيها اكل وإنت رايح الشغل أديك فيها عادي

- بخصوص الشغل أنا ضد إن الراجل يشتغل أنا مع إن المرآة تنزل تلقّط رزقها وتصرف على البيت